Meksikada "Otis" to‘foni qurbonlari soni 50 ga yaqinlashdi
To‘fon Akapulko sohilidagi kurortlar yaqiniga yetib kelganidan keyin yana 36 kishi bedarak yo‘qolgan.
Meksikaning Gerrero shtatiga yopirilgan "Otis" to‘foni qurbonlari soni 48 kishiga yetdi, yana 36 kishi bedarak yo‘qolgan. Bu haqda Gerrero shtati gubernatori Evelin Salgado maʼlum qildi.
Meksika prezidenti Andres Manuel Lopes Obrador ham qidiruv-qutqaruv ishlari uzluksiz davom etayotganini taʼkidladi.
Davlat rahbari tabiiy ofat zonasiga borish niyatini bildirdi.
Lopes Obrador hukumat mahalliy hokimiyat organlari bilan yaqin aloqada ekanini taʼkidladi.
Maʼlumot uchun: Tinch okeanida yuzaga kelgan "Otis" to‘foni 25 oktyabr kuni Meksikaga yaqinlashdi. U Meksikaning janubiy qirg‘oqlariga yopirilgan paytda Saffir-Simpson shkalasi bo‘yicha beshinchi toifaga chiqqan.
To‘fon tufayli o‘n minglab aholi uylariga zarar yetgan.
To‘fonning ehtimoliy oqibatlarini bartaraf etish uchun hududga 17 ming harbiy va politsiyachi safarbar etilgan.
