Yevroittifoq Rossiyaga qarshi sanksiyalarining 12-paketini tayyorlamoqda
YeI bu gal Rossiya iqtisodiy og‘ir zarba olishiga ishonadi.
Yevrokomissiya yaqin orada Yevropa Ittifoqining Rossiyaga qarshi sanksiyalarining 12-paketini taqdim etadi.
Unda import va eksportga yangi taqiqlar hamda neft narxining yuqori chegarasini kuchaytirish choralari joy olgan.
"Tez orada biz sanksiyalarning 12-paketini taqdim etamiz. Ro‘yxatga yangi qo‘shimchalar kiritilgan. Import va eksportga yangi taqiqlar, neft narxining shiftini kuchaytirish bo‘yicha harakatlar shular jumlasidandir", — deb yozdi Yevrokomissiya rahbari.
Avvalroq Politico gazetasi Yevrokomissiya kelgusi haftada Rossiya Federatsiyasiga qarshi sanksiyalarning 12-paketi bo‘yicha o‘z takliflarini taqdim etishi kutilayotgani, muhokamalar yil oxirigacha davom etishi mumkinligini xabar qilgandi. Yevropa Ittifoqining Rossiyaga qarshi yangi sanksiyalari kimyoviy moddalar, harbiy maqsadlarda foydalaniladigan texnologiyalar, qayta ishlangan metallar, alyuminiy mahsulotlari, qurilish va transport mahsulotlari, payvandlash mashinalari va dasturiy taʼminot litsenziyalarini o‘z ichiga olishi mumkin. Bundan tashqari, Rossiya olmoslarini olib kirishni taqiqlash masalasi ham muhokama qilinmoqda.
Sanksiyalarning 12-to‘plami uchinchi davlatlar orqali sanksiyalarni chetlab o‘tishga urinishlarga qarshi choralarni ham o‘z ichiga oladi. Ittifoq allaqachon ko‘rilgan choralarga uchinchi mamlakatlardagi ko‘proq tovarlar va kompaniyalarni qo‘shishga harakat qiladi.
Joriy yilning iyun oyida Ittiffoqning Rossiyaga qarshi 11-sanksiya paketi kiritilganidan so‘ng Yevropa Ittifoqining shaxsiy cheklovlari deyarli 1,8 ming shaxs va tashkilotlarga taʼsir ko‘rsatdi. Cheklovchi choralar Yevropa Ittifoqi mamlakatlaridagi aktivlarni muzlatish bilan bog‘liq. Yevropa Ittifoqi fuqarolari va kompaniyalariga sanksiyalar ro‘yxatidagilarga mablag‘ berish taqiqlanadi. Jismoniy shaxslarga qo‘shimcha ravishda sayohat taqiqlanadi, bu esa ularning Yevropa Ittifoqiga kirishiga yoki mintaqa orqali tranzit o‘tishiga to‘sqinlik qiladi.
Rossiya G‘arb bir necha yil avval boshlagan va kuchayishda davom etayotgan sanksiya bosimiga dosh berishini bir necha bor taʼkidlagan.
Shuningdek, ayrim ekspertlar ham Rossiya iqtisodiyoti sanksiyalar bosimi ostida sinish o‘rniga ularga chap berib qolayotgani haqida gapirgan.
