Bemor ayolga tegajog'lik qilgani aytilayotgan tez yordam xodimi ushlandi
Holat yuzasidan jinoyat ishi qo‘zg‘atilgani aytilmoqda.
Toshkentda tez yordam chaqiruviga ko‘ra kelgan xodim bemor ayolga uyatsiz harakatlar qilgani haqida xabarlar tarqalgandi. Holat yuzasidan jinoyat ishi qo‘zg‘atildi.
Poytaxt IIBB matbuot kotibi Nilufar Isoxonovaning xabar berishicha, mazkur holat yuzasidan Olmazor tumani IIO FMB tergov bo‘limi tomonidan Jinoyat kodeksining 119-moddasiga (jinsiy ehtiyojni zo‘rlik ishlatib g‘ayritabiiy usulda qondirish) asosan jinoyat ishi qo‘zg‘atilgan. Gumon qilinuvchi protsessual tartibda ushlangan.
Ushbu moddada ko‘zda tutilgan jinoyatni sodir etganlik uchun 5 yildan 8 yilgacha ozodlikdan mahrum qilish jazosi belgilangan.
Toshkentda bemor ayolning tibbiyot xodimi tomonidan jinsiy tajovuzga uchragani haqida jurnalist va bloger Shahnoza Soatova xabar bergandi.
