Samarqandda poraxo‘r soliqchilar qamaldi
Ularga 5 yil ozodlikdan mahrum qilish jazosi tayinlangan.
Samarqandda ikki nafar soliq inspeksiyasi xodimi pora olgani uchun qamaldi. Bu haqda “Zamon” informatsion dasturida xabar qilindi.
Maʼlum bo‘lishicha, soliq inspeksiyasi xodimi Bulung‘ur tumanida tadbirkorlik bilan shug‘ullanuvchi fuqaroga soliqlardan asossiz hisoblangan qarzdorlikni kamaytirishda yordam berishini aytgan. Buning evaziga 1000 AQSH dollari talab qiladi. Ushbu pul evaziga tadbirkorning qariyb 300 mln so‘mlik soliq va penya qarzdorligini kamaytirib bermoqchi bo‘ladi. Jinoyatiga tuman kameral soliq tekshiruvlari shuʼbasi boshlig‘ini ham sherik qiladi.
Soliqchi tadbirkordan kelishilgan pulning 500 dollarini olayotganida ashyoviy dalillar bilan qo‘lga olingan.
Jinoyat ishlari bo‘yicha Samarqand shahar sudida soliq xodimlari Jinoyat kodeksining 210-moddasi 2-qismi “v” bandi bilan aybdor deb topilib, 5 yilga ozodlikdan mahrum qilindi.
