Putin: noqonuniy migratsiya to‘xtatiladi
Rossiyadan 2023-yil 110 mingga yaqin noqonuniy muhojir chiqarib yuborilgan.
Rossiya prezidenti Vladimir Putin 2-aprel kuni bo‘lib o‘tgan Ichki ishlar vazirligi kollegiyasining kengaytirilgan yig‘ilishida noqonuniy migratsiyani to‘xtatish bo‘yicha topshiriq berdi.
Rossiyadan 2023-yil 110 mingga yaqin noqonuniy muhojir chiqarib yuborilgan. Bu 2022-yilga nisbatan 65 foizga ko‘pdir.
Jamoat tartibini ta’minlash, ekstremizmga qarshi kurashish, noqonuniy migratsiyaga chek qo‘yish, joylardagi xizmatlar faoliyati, shuningdek, Ichki ishlar vazirligining uyushgan jinoyatchilikni zararsizlantirish borasidagi faoliyati kabi vazifalarga alohida e’tibor qaratishingizni so‘rayman, — dedi Putin.
Ichki ishlar vaziri Vladimir Kolokolsеv 2023-yilda migrantlar tomonidan sodir etilgan jinoyatlar, jumladan, qotillik 18 foizga, o‘g‘irlik 14 foizga, o‘g‘rilik 32 foizga, tartibsizliklar 22 foizga kamayganini aytdi.
Putin mamlakatga noqonuniy kirish ekstremizm va jinoyatchilik uchun “ozuqaviy muhit” hisoblanishini ta’kidladi. Unga ko‘ra, mamlakatning urf-odatlari, tarixi, tilini hurmat qilmaydiganlar Rossiyaga kiritilmasligi kerak. Bu qoida mamlakat migratsiya siyosatining asosiy tamoyili bo‘lishi lozim.
U Rossiyada faoliyat yuritayotgan jinoiy sindikatlar ko‘pincha transchegaraviy bo‘lib, xorijiy razvedka xizmatlari va xalqaro radikal ekstremistik tuzilmalarning emissarlari bilan hamkorlik qilishini aytdi.
Bunday turdagi jinoiy jamoalar odam savdosi va giyohvand moddalar savdosi bilan ham shug‘ullanadi, shuningdek, moliyaviy jinoyatlar va kiberjinoyatlar sodir etadi, — dedi Putin.
Rossiya Ichki ishlar vazirligi migrantlarning Rossiyada vaqtincha bo‘lish muddatini bir kalendar yili davomida jami 90 kungacha qisqartirishni taklif qilgan. Shuningdek, vazirlik barcha xorijliklarni Rossiyaga kirishda daktiloskopiyadan o‘tish va suratga olish majburiyatini yuklash tashabbusi bilan chiqdi.
26-mart kuni Putin Rossiya Ichki ishlar vazirligi va Bosh prokuraturasiga migratsiya qonunchiligiga rioya etilishini taʼminlash bo‘yicha qo‘shimcha chora-tadbirlar kompleksini ishlab chiqish bo‘yicha topshiriq berdi. U bu sohadagi vaziyat nazorat ostida bo‘lishi kerakligini taʼkidladi.
