Isroil Rafahdagi qochqinlar lageriga zarba berdi — video
Yong‘iт oqibatida 40 ga yaqin odam halok bo‘ldi.
Isroil kuchlari Rafahdagi qochqinlar yashaydigan Tal-as-Sulton lagerini bombardimon qildi.
Taʼkidlanishicha, qurbonlarning aksariyati ayollar va bolalar bo‘lgan. Falastin Qizil yarim oy jamiyati chodirlardagi ko‘plab odamlar tiriklayin yonib ketganini taʼkidlagan.
“Hududdagi shifoxonalar Isroil ishg‘olining G‘azo sektoridagi sog‘liqni saqlash tizimini ataylab yo‘q qilishi natijasida bunday ko‘p sonli jarohatlanganlari sig‘dira olmayapti”, — deyiladi bayonotda.
Mahalliy manbalar kamida sakkizta raketa BMTning falastinlik qochqinlarga yordam ko‘rsatuvchi agentligi (UNRWA) ombori yonida yaqinda o‘rnatilgan chodir lageriga urilganini aytdi.
"Potensial xalqaro miqyosda taqiqlangan qurollarni qo‘llash yirik yong‘in kelib chiqishiga sabab bo‘lgan, oqibatda jabrlanganlar oyoq-qo‘llarini yo‘qotgan va boshqa jarohatlar olgan. Biz 50 ga yaqin odamni va yaradorlarni hududdan olib chiqib, dala kasalxonalariga yetkazdik”, — deya taʼkidladi G‘azo fuqarolik mudofaasi guruhlarini boshqaradigan doktor Muhammad al-Mug‘ayyir.
Isroil armiyasi o‘z bayonotida HAMAS lageriga havo hujumi uyushtirilganini daʼvo qildi. Harbiylar tinch aholi jarohatlanganidan xabardor ekanini maʼlum qildi.
“Zarba xalqaro qonunlarga muvofiq, aniq o‘q-dorilardan foydalangan holda va HAMAS hududdan foydalanayotganini ko‘rsatuvchi aniq razvedka maʼlumotlariga asoslanib, qonuniy nishonlarga qarshi amalga oshirildi”, — deya qo‘shimcha qildi Isroil armiyasi.
