KXDR harbiylari delegatsiyasi rahbari Rossiyada cho‘kib ketdi
Uning jasadi bir kundan so‘ng suv yuziga qalqib chiqqan.
Shimoliy Koreya harbiylari delegatsiyasi rahbari Kim Kum Cheol Zelenograddagi “Angstrem” plyajiga dam olish uchun borgan. Oradan bir necha soat o‘tgach, uning hamkasblari uni topisha olmagan va politsiyaga murojaat qilgan. Ertasi kuni KXDR fuqarosining jasadi suv yuziga qalqib chiqqan.
Reutersʼning qayd etishicha, vafot etgan fuqaro Kim ir Sen nomidagi harbiy universitetga rahbarlik qilgan. Kim Kum Cheol Moskva va Pyongyang o‘rtasida umumqamrovli strategik hamkorlik to‘g‘risida shartnoma imzolanganidan so‘ng Rossiyaga ikki davlat o‘rtasidagi almashinuv doirasida kelgan elita delegatsiyaga rahbarlik qilgan. Tashrifning boshqa tafsilotlari hozircha maʼlum qilingani yo‘q.
Eslatib o‘tamiz, Rossiya va Shimoliy Koreya o‘rtasidagi munosabatlar iyun oyida Putinning Pyongyangga tashrifidan so‘ng yangi impuls oldi. Janubiy Koreya radiosining maʼlum qilishicha, tashrifdan so‘ng, KXDR o‘zining injenerlik qo‘shinlarini Ukrainaning okkupatsiya qilingan hududlariga “tiklanish ishlari”ni amalga oshirish uchun jo‘natishni rejalashtirayotgani maʼlum bo‘lgan.
