Jo Baydenda koronavirus aniqlandi
Oq uy matbuot xizmati prezidentning ahvoli haqida bayonot berdi.
Oq uy matbuot xizmati 18 iyul, payshanbaga o‘tar kechasi AQSH prezidenti Jo Bayden koronavirusga chalinganini maʼlum qildi.
Matbuot xizmatining taʼkidlashicha, 81 yoshli yetakchi COVID-19‘ga qarshi emlangan. Shu jumladan, kuchaytiruvchi ukol olgan va faqat yuqori nafas yo‘llarida kasallikning yengil alomatlari, yaʼni burun oqishi va quruq yo‘talni boshdan kechirmoqda. Davolovchi shifokor AQSH prezidentining umumiy ahvoli qoniqarli ekanini bildirdi.
Bayden koronavirus aniqlanganidan so‘ng o‘zini “yaxshi” his qilayotganini aytdi. Uning kasallangani haqidagi xabar Nevadadagi tadbirda bo‘lganida keldi. Oq uyning xabar berishicha, prezident Delaverdagi uyiga qaytib, o‘zini izolyatsiya qilish niyatida, bu vaqt davomida u davlat rahbari sifatida vazifalarini to‘liq bajarishda davom etadi.
Bayden sog‘lig‘i bilan bog‘liq muammolar tufayli nomzodini qo‘yish qarorini qayta ko‘rib chiqishga tayyor.
Avvalroq, 17 iyul kuni Jo Bayden jurnalist Ed Gordonga bergan intervyusida faqat sog‘lig‘i bilan bog‘liq sharoit uni ikkinchi prezidentlik muddatiga nomzodini qo‘yish qarorini qayta ko‘rib chiqishga majbur qilishini tan olgandi.
