Yevrokomissiya Ukrainaga yana 4,2 mlrd yevro ajratishni qo‘llab-quvvatladi
Biroq yangi paket hali Yevropa Ittifoqi davlat va hukumat rahbarlari tomonidan tasdiqlanishi kerak.
"Yevropa Ittifoqi kengashida qabul qilingandan so‘ng, ushbu mexanizm bo‘yicha Ukraina uchun YI tomonidan ajratiladigan mablag‘larning umumiy miqdori 12 milliard yevroga yetadi", — deydi Yevrokomissiya rahbari Ursula fon der Lyayen.
Yevrokomissiya qarorida qayd etilganidek, Ukraina moliyaviy yordam shartlari sifatida ilgari surilgan bir qator talablarni bajardi. Ular, xususan, soliq to‘lashdan bo‘yin tovlash va iqtisodiy jinoyatlarga qarshi yana-da samaraliroq kurashish bo‘yicha islohotlar, shuningdek, davlat kompaniyalari boshqaruvidagi o‘zgarishlar, milliy energiya va iqlim rejasini qabul qilish zaruratidir.
Barcha qiyinchiliklarga qaramay, Ukraina Rossiyadan o‘zini himoya qilib, mamlakatni yana-da tiklash va Yevropa Ittifoqiga aʼzolik sari olg‘a siljish uchun muhim islohotlarni amalga oshirmoqda, dedi fon der Lyayen. Uning qo‘shimcha qilishicha, u Yevropa Ittifoqi mamlakatlari yangi yordam paketini tezda tasdiqlashiga umid qilmoqda.
2024 yil fevralida YI kengashi Ukrainaga 50 milliard yevrolik Yevropa yordam jamg‘armasini tashkil etishni maʼqulladi. 2024 yildan 2027 yilgacha, to‘rt yilga mo‘ljallangan ushbu mablag‘lar grant va kreditlar ko‘rinishida berilishi rejalashtirilgan. Ular Ukraina davlatining qisqa muddatli ehtiyojlarini ham, mamlakatni qayta qurish va modernizatsiya qilish bo‘yicha o‘rta muddatli vazifalarni hal qilishni ham taʼminlashi kerak.
