Andijonda pora olgan organ xodimlari qamaldi
Ular 15 ming dollar pora bilan qo‘lga tushgandi.
Avvalroq Asaka tumani IIB tergov bo‘linmasining sobiq xodimi va prokuror o‘rinbosari qurilish firmasi rahbariga nisbatan qo‘llanilgan qamoq ehtiyot chorasini o‘zgartirib, aniqlangan zarar summasini kamaytirib berish evaziga 15 ming AQSH dollarini olgan vaqtida ushlangani xabar qilingandi.
Mazkur jinoyat ishi yuzasidan joriy yilning 26 iyun kuni Andijon viloyati jinoyat ishlari bo‘yicha Izboskan tuman sudida sudlanuvchilar X.A. va S.X.ga oid jinoyat ishi ko‘rib chiqildi.
Sud hukmiga ko‘ra, sudlanuvchi S.X. JKning 25,168-moddasi 4-qismi “a” bandi va 28,211-moddasi 3-qismi “a” bandida nazarda tutilgan jinoyatlarni sodir etganlikda aybli deb topildi.
Sudlanuvchi S.X.ga nisbatan JKning 59,61-moddalari tartibida jazolarni qisman qo‘shish yo‘li bilan o‘tash uchun uzil-kesil 2 yil muddatga huquqni muhofaza qiluvchi organlarda ishlash huquqidan va 8 yil 6 oy muddatga ozodlikdan mahrum qilish jazolari tayinlandi.
Sudlanuvchi X.A. JKning 25,168-moddasi 4-qismining “a” bandi va 28,211-moddasi 3-qismining “a” bandida nazarda tutilgan jinoyatlarni sodir etganlikda aybli deb topildi.
Unga nisbatan JKning 59,61-moddalari tartibida jazolarni qisman qo‘shish yo‘li bilan o‘tash uchun uzil-kesil 2 yil muddatga huquqni muhofaza qiluvchi organlarda ishlash huquqidan va 6 yil 1 oy muddatga ozodlikdan mahrum qilish jazolari tayinlandi.
