Bangladeshda qatʼiy rejimli qamoqxonadan 200 dan ortiq mahbus qochib ketdi
Kuni kecha mamlakat shimolidagi qamoqxonadan ham 500 nafar mahbus qochib ketgandi.
Bangladeshning G‘ozipur shahridagi qatʼiy rejimli Kashimpur qamoqxonasi mahbuslari mamlakatdagi norozilik namoyishlari va tartibsizliklar tufayli ommaviy ravishda qamoqxonadan qochib ketdi. Bu haqida Jago axborot portali bergan xabarga tayanib “Report.az” maʼlum qildi.
“209 nafar mahbus qochishga muvaffaq bo‘lgan, ulardan olti nafari voqea joyida otib o‘ldirildi”, — deyiladi Jago axborot portali xabarida.
Qamoqxona vakili Subrata Kumarning aytishicha, mahbuslar 6 avgust, seshanba kuni tushdan keyin qochishga urinib, tartibsizliklar uyushtirgan. Qamoqxona qo‘riqchilari vaziyatga aralashgach, mahbuslar ularga hujum qilgan.
Qayd etilishicha, vaziyat faqat armiya kuchlari yordamida nazoratga olingan.
5 avgust kuni ertalab Bangladeshda hukumatga qarshi ommaviy namoyishlar vaqtida tayoq va toshlar bilan qurollangan olomon Bangladesh shimolidagi Sherpur tumani qamoqxonasiga bostirib kirgan va undan 500 nafar mahbus qochib ketgandi.
