Afg‘oniston hukumati BMT maxsus maʼruzachisining mamlakatga kirishini taqiqladi
Bu haqida Germaniyaning Deutsche Welle telekanaliga bergan intervyusida Tolibon rasmiysi Zabihulloh Mujohid maʼlum qildi.
Afg‘oniston hukumati BMTning Afg‘onistondagi inson huquqlari bo‘yicha maxsus maʼruzachisi Richard Bennetning mamlakatga kirishini taqiqladi.
“Janob Bennetning Afg‘onistonga safari taqiqlangan, chunki u Afg‘onistonda tashviqot olib borishga tayinlangan. U biz ishonadigan odam emas. Uning Afg‘onistonda o‘rni yo‘q, targ‘ibot ishlari bilan band bo‘lgani uchun kelishiga ham ruxsat berishmayapti. U mayda-chuyda masalalarni bo‘rttirib, boshqa muassasalarga yolg‘on maʼlumot berdi”, — dedi Mujohid.
Uning so‘zlariga ko‘ra, BMT institutlari Afg‘onistonda bo‘layotgan “ijobiy voqealar”ni ko‘rmaydi, balki diqqatini “o‘z fikricha, zaif masalalarga” qaratadi.
"Ular Afg‘onistonga qarshi tashviqot olib borish uchun barcha saʼy-harakatlarni amalga oshirmoqda", — deya qo‘shimcha qildi u.
Bennet 2022 yil aprelida BMTning Afg‘onistondagi inson huquqlari bo‘yicha maxsus maʼruzachisi etib tayinlangan. U Afg‘onistonning amaldagi maʼmuriyatini mamlakatdagi inson huquqlari ahvoli uchun tanqid qilgan.
O‘z navbatida, Afg‘oniston maʼmuriyati xalqaro hamjamiyatning, xususan, inson huquqlari sohasidagi hisobotlari “Afg‘onistondagi voqeliklarga zid” ekanini daʼvo qilmoqda.
