Germaniyada demokratiyaga tahdid bo‘lmoqda
Saylov fonida ayrim siyosiy kuchlar demokratik tizimga qarshi kurashmoqda.
Germaniya prezidenti mamlakatdagi saylovlar oldidan demokratiyaga tahdid borligi haqida ogohlantirdi.
Frank-Valter Shtaynmayer Saksoniya va Tyuringiya hududiy parlamentlariga saylovlardan bir hafta oldin bergan intervyusida “Demokratiyamiz poydevoriga hujum qiladigan hech qaysi shaxs hokimiyatga erishmasligi kerak”, deya fikr bildirdi.
Shtaynmayer gap qaysi siyosiy kuchlar haqida ketayotganiga aniqlik kiritmadi. Maʼlumotlarga ko‘ra, bu hududlarda, o‘ng qanot populist “Germaniya uchun muqobil” partiyasi yetakchilik qilmoqda. Ko‘pchilik saylovchilar Sara Vagenknextning yangi so‘l populistik partiyasiga ham ovoz berishga tayyor. Har ikkila partiya Germaniyaga immigratsiyani qatʼiy cheklashni, Ukrainaga yordamni to‘xtatishni va Rossiya bilan hamkorlikni tiklashni talab qilmoqda.
Germaniya prezidentining so‘zlariga ko‘ra, baʼzi nemis siyosatchilari o‘zlari “nafratlanadigan” siyosiy tizimga, yaʼni siyosiy institutlar, kasaba uyushmalari va mustaqil ommaviy axborot vositalariga qarshi kurashmoqda.
“Bunday kuchlar mamlakatni yaxshi tomonga o‘zgartirish uchun hech narsa taklif qilmaydi, ular boshqacha mamlakatni xohlashadi”, — deya taʼkidladi Shtaynmayer.
