Turkiyada tutqunlikda saqlangan o‘zbekistonlik ayol qutqarildi
Hozirda ayolni O‘zbekistonga qaytarish ishlari davom etmoqda.
Bosh konsulxonaga Tashqi ishlar vazirligi orqali Qarshi shahridan 21 yoshli fuqaro o‘z onasining Istanbulga 4 yil oldin ketgani, 3 yildan beri aloqaga chiqmayotganini aytib, onasini topish va vatanga qaytarishda yordam so‘ragan murojaati kelib tushgan.
Olib borilgan tekshirishlar davomida 1982 yil Qarshi shahrida tug‘ilgan X.D. Turkiyaning Ushoq shahrida Turkiya fuqarosi M.G. tomonidan erkiga xilof ravishda tutqunlikda ushlab turilganligi aniqlangan.
Joriy yilning 27 avgust kuni Bosh konsulxona, Tashqi mehnat migratsiyasining Istanbul shahridagi vakili, “O‘zbek ayollari huquqlarini himoya qilish” jamiyati va Turkiya Ichki ishlar vazirligi bilan hamkorlikda tezkor tadbir o‘tkazilgan.
“Natijada vatandoshimizning hayotiga va sog‘ligiga ziyon yetkazilmagan holda qutqarilib Ushoq shahar ichki ishlar boshqarmasiga yetkazildi”, - deyiladi xabarda.
Turkiya qonunchiligiga binoan shaxsni erkiga xilof ravishda tutqunlikda saqlaganligi uchun M.G.ga nisbatan jinoyat ishi qo‘zg‘atildi. Hozirda X.D.ni O‘zbekistonga qaytarish bo‘yicha tegishli ishlar davom ettirilmoqda.
