Jizzaxdagi dovonda 4 ta mashina avariyaga uchradi
Hodisaga yuk mashinasining boshqaruvni yo‘qotishi sabab bo‘lgan.
Kecha, 4 sentyabr kuni Jizzax viloyatining G‘allaorol tumanida to‘rtta avtomashina ishtirokida yo‘l-transport hodisasi yuz berdi.
Yo‘lning dovon qismida harakatlanib kelayotgan “Gaz-52” yuk avtomashinasi haydovchisi nishablikda boshqaruvni yo‘qotgan. Oqibatda ushbu yuk avtomashinasi o‘zidan oldinda bir yo‘nalishda harakatlanib ketayotgan Captiva‘ning orqa chap yon tomonidan va Nexia-3‘ning orqa tomonidan urgan. To‘qnashuv oqibatida Nexia-3 o‘zidan oldinda bo‘lgan Spark avtomashinasining orqa qismiga urilgan.
Hodisa oqibatida halok bo‘lganlar yo‘q. Nexia-3 avtomashinasi yo‘lovchisiga birinchi tez tibbiy yordam ko‘rsatilgan.
Hodisa joyini ko‘zdan kechirish va rasmiylashtirish vaqtida avtomobil yo‘lida tirbandlik yuzaga kelgan.
