Ukraina qurol ishlab chiqarishni ko‘paytirmoqda
Bu mamlakatning G‘arb harbiy yordamiga bog‘liqligini kamaytiradi.
Amerika urushni o‘rganish instituti maʼlumotiga ko‘ra, Ukraina mahalliy qurol ishlab chiqarishni kengaytirish va uchuvchisiz tizimlar sohasida Rossiyadan ustunligini saqlab qolish bo‘yicha saʼy-harakatlarini davom ettirmoqda.
Ukraina prezidenti Vladimir Zelenskiy 1 oktyabr kuni Ukraina kompaniyalari hozirda yiliga 4 million dron ishlab chiqarishi mumkinligini aytdi, rasmiylar esa hozirgacha 1,5 million dona dron ishlab chiqarish bo‘yicha shartnoma imzolagan.
Rossiya prezidenti Vladimir Putin yaqinda Rossiya 2024 yilda dron ishlab chiqarish hajmini 10 barobarga oshirib, 1,4 million donaga yetkazishni rejalashtirayotganini aytdi.
Zelenskiy, shuningdek, Ukraina har oy 15 ta “Bogdan” o‘ziyurar artilleriya tizimini ishlab chiqarishi mumkinligini taʼkidladi.
Ukraina mudofaa vaziri Rustem Umerovning bayonotlariga ko‘ra, Ukraina dronlar va uzoq masofali raketalar, jumladan ballistik raketalarni mahalliy ishlab chiqarishga ustuvor ahamiyat berishda davom etmoqda.
ISW hisob-kitoblariga ko‘ra, Ukrainaning mahalliy ishlab chiqarishni kengaytirish borasidagi saʼy-harakatlari uzoq muddatda uning G‘arb harbiy yordamiga bog‘liqligini kamaytiradi, biroq hozircha Kiyev himoyalanish uchun hamon G‘arbning muhim yordamiga muhtoj.
