Eronning zarbasi sabab neft narxi ko‘tarilishi mumkin
Isroil mamlakatning neft infratuzilmasiga hujum qilishi kutilmoqda.
Isroil Eron tomonidan uchirilgan raketalar hujumiga javob tariqasida mamlakatning neft infratuzilmasiga zarba berishi mumkin. Bu haqida Axios nashri yozmoqda.
Xabarga ko‘ra, Isroil rasmiylari portalga Isroil muhim javob zarbasi berishini, bu zarba neft qazib olish korxonalari va boshqa strategik obyektlarga qaratilishi mumkinligini aytishgan. Ular barcha variantlar, jumladan, Eron yadro markazlariga zarba berish imkoniyati ko‘rib chiqilishini taʼkidlagan.
Maʼlumki, Eron OPEK (Neft eksport qiluvchi mamlakatlar tashkiloti) aʼzosi va jahon neft bozorida asosiy rol o‘ynaydi. Hisob-kitoblarga ko‘ra, agar Eronning neft infratuzilmasi shikastlansa, dunyo neft taʼminotining 4 foizigacha xavf ostida bo‘lishi, neft narxi esa bir barrel uchun rekord darajadagi 200 dollarga yetishi mumkin.
