Britaniya Rossiyaning axborot agentliklariga sanksiya kiritdi
Ular noto‘g‘ri maʼlumot tarqatishda ayblangan.
Buyuk Britaniya Rossiyaning “dezinformatsion agentliklari” ga qarshi sanksiyalar joriy qildi.
“Agentstvo sotsialnogo proyektirovaniya” agentligi, “Dialog”, “Struktura” kompaniyalar guruhi, shuningdek, ularning uch nafar boshqaruvchisi sanksiyalar ro‘yxatiga kiritildi.
"Ushbu shaxs va tashkilotlar Ukraina va uning demokratiyasiga putur yetkazish hamda beqarorlashtirish uchun noto‘g‘ri maʼlumotlar tarqatishadi. Ular Kiyevga xalqaro qo‘llab-quvvatlashni zaiflashtirish maqsadida taʼsir o‘tkazish amaliyotlarini o‘tkazishdi", deyiladi tegishli bayonotda.
"Bugungi sanksiyalar biz sizning yolg‘on va noqonuniy aralashuvingizga toqat qilmasligimizni bildiradi", — deya sanksiyalarga izoh berdi Buyuk Britaniya Tashqi ishlar vaziri Devid Lemmi.
Mart oyida Qo‘shma Shtatlar "Agentstvo sotsialnogo proyektirovaniya” agentligi asoschisi Ilya Gambashidze va “Struktura” bosh direktori Nikolay Tupikinga "Rossiya prezidenti maʼmuriyatining ko‘rsatmasi bilan xorijda zararli taʼsir ko‘rsatganlik" uchun sanksiyalar kiritgan edi.
