Rossiyada o‘qituvchilarning mukofot pullari harbiylarga yuborilmoqda
Mudofaa tizimlari uchun pul yetarli emasligi aytilmoqda.
Rossiyaning Irkutsk viloyatida o‘qituvchilar, tarbiyachilar va madaniyat muassasalari xodimlarining mukofot pullari Ukrainaga qarshi urush ehtiyojlari uchun sarflanmoqda. Bu haqida The Moscow Times nashri yozmoqda.
Qayd etilishicha, oktyabr oyi oxirida konferensiya bo‘lib o‘tgan va unda viloyat mutasaddilari rag‘batlantiruvchi to‘lovlarning bir qismini ushlab qolishlarini maʼlum qilgan.
“Ular havo hujumidan mudofaa tizimlari uchun pul yetarli emasligini, xavfsizlik yostiqchalari yo‘qligini, hammasi sarflanganini aytishdi”, dedi nashr suhbatdoshi.
Rag‘batlantirish to‘lovlari har bir xodim uchun alohida hisoblab chiqiladi va 10 dan 40 ming rublgacha bo‘lishi mumkin. Nashr suhbatdoshi aniqlik kiritishicha, to‘lovlar yil oxirida uch oyga bo‘lingan.
