AQSH Ukrainani harbiy safarbarlik yoshini 18 ga tushirishga chaqirdi
Bu haqida ismini oshkor qilmaslik sharti bilan prezident Jo Bayden maʼmuriyati vakili maʼlum qildi.
"Ukraina urushga yetarlicha odamlarni safarbar qilmayapti va shuning uchun ham hozir Donbassda chekinmoqda. Bizga ko‘proq insoniy resurslar kerak. Ruslar oldinga siljib, sharqda barqaror muvaffaqiyatga erishmoqda. Ular Kursk viloyatida ukrainaliklarni ortga surishni boshladi. Endi jang maydonidagi vaziyatni safarbarlik va ko‘proq askarlar o‘zgartirishi mumkin", — deya amerikalik amaldorning so‘zlarini keltiradi Reuters.
Bayden maʼmuriyati rasmiysiga ko‘ra, Kiyev yana 160 ming odamni safarbar etish kerak, deb hisoblaydi. Ammo Vashington safarbar qilinganlar soni yana-da ko‘proq bo‘lishi kerakligini taklif qilmoqda.
Ukrainadagi qonunchilikka ko‘ra, 25 yoshdan 60 yoshgacha bo‘lgan erkaklar urushga safarbar qilinadi. 18 yoshdan 25 yoshgacha bo‘lgan yigitlar, ayrim istisnoli holatlardan tashqari, chaqiruv va boshlang‘ich harbiy tayyorgarlikdan o‘tishadi, lekin frontga jo‘natilmaydi.
