AQSH Gruziyaga nisbatan sanksiyalar joriy qilmoqchi
Bunga mamlakatdagi namoyishlar sabab qilib ko‘rsatilgan.
Qo‘shma Shtatlar Gruziyadagi norozilik namoyishlari tufayli mamlakat rasmiylariga qarshi sanksiyalar joriy etishni rejalashtirmoqda. Bu haqida AQSH Davlat kotibi maʼlum qildi.
Entoni Blinken Gruziya hukumatini tinch yig‘ilishlar va o‘z fikrlarini bildirish huquqidan foydalangani uchun hibsga olinganlarni zudlik bilan ozod qilishga chaqirdi.
"AQSH hukmron “Gruziya orzusi” partiyasining mamlakat fuqarolari, ommaviy axborot vositalari xodimlari va muxolifat vakillariga nisbatan asossiz zo‘ravonliklarini keskin qoralaydi. Biz “Gruziya orzusi”ni repressiv harakatlarini, jumladan, o‘zboshimchalik bilan hibsga olish va jismoniy zo‘ravonliklarni, hukumatni tanqid qilganlarning ovozini o‘chirishga urinishlarni to‘xtatishga chaqiramiz. Biz, ayniqsa, huquq-tartibot idoralari xodimlarining xatti-harakatlari tufayli odamlarning og‘ir tan jarohati olishi haqidagi xabarlardan xavotirdamiz", — deya taʼkidladi AQSH Davlat kotibi.
