Tamaki sabab yiliga millionlab odamlar vafot etmoqda
JSST bu bo‘yicha yangi hisobotni eʼlon qildi.
JSST tomonidan eʼlon qilingan yangi hisobotga ko‘ra, tashkilotning Yevropa mintaqaviy byurosiga aʼzo mamlakatlarda 18 yoshdan yuqori aholining 179 million nafari va 13-15 yoshli o‘smirlarning 4 million nafari tamaki isteʼmol qiladi.
Ushbu zararli odat mintaqada yuqumli bo‘lmagan kasalliklardan o‘lim holatlarining 18 foiziga sabab bo‘lyapti. Yaʼni bu davlatlarda tamaki isteʼmoli oqibatida yiliga 1,2 milliondan ortiq kishi hayotdan ko‘z yummoqda.
JSSTning Yevropa mintaqaviy byurosi vakili Galen Galea fikricha, bunday salbiy o‘sish dinamikasi tamaki sanoati rivoji, jozibador reklamalar ko‘payib, qonuniy cheklovlar tobora susayib borayotgani bilan bog‘liq.
“Agar bu borada zarur choralar ko‘rilmasa, 2030 yilga borib, mintaqamiz tamaki isteʼmoli bo‘yicha dunyoda eng yuqori statistika qayd etishi mumkin”, — deb qo‘shimcha qildi ekspert.
vaholanki, Global harakatlar rejasiga muvofiq, mintaqa davlatlari 2025 yilga borib tamaki isteʼmolini 30 foizga kamaytirish majburiyatini olgan. Biroq bor-yo‘g‘i 11 ta mamlakat bu borada tizimli ravishda harakat qilmoqda.
Mavjud vaziyatni hisobga olib, JSST tegishli davlatlarni tamaki mahsulotlari isteʼmoli, ishlab chiqarilishi, realizatsiya va targ‘ibotini qatʼiy tartibga solishga chaqirdi.
