Senat kosmik faoliyat to‘g‘risidagi qonunni maʼqulladi

Oliy Majlis Senatining navbatdagi yalpi majlisida "Kosmik faoliyat to‘g‘risida"gi qonun maʼqullandi.

 

Qonun kosmik faoliyatning asosiy tushunchalari va tamoyillarini, uni amalga oshirish maqsadlarini, kosmik faoliyat sohasidagi davlat siyosatining asosiy yo‘nalishlarini nazarda tutadi. Shuningdek, Vazirlar Mahkamasi, Raqamli texnologiyalar vazirligi va unga qarashli Kosmik tadqiqotlar va texnologiyalar agentligi hamda Mudofaa vazirligining kosmik faoliyat sohasidagi vakolatlari belgilanmoqda.

 

Senatorlarning taʼkidlashicha, qonunning qabul qilinishi natijasida kosmik faoliyat sohasi tartibga solinadi, masʼul organlar, ularning vakolatlari va majburiyatlari aniq belgilanadi, yuzaga kelishi mumkin bo‘lgan xavf-xatarlarning oldini olishda kosmik faoliyatni amalga oshirishning huquqiy kafolatlari yaratiladi.

 

"Bu bizga mamlakatimizda barcha sohalarda, jumladan, yer munosabatlari, geologiya, seysmik xavfsizlik, transport, qishloq, o‘rmon, suv va yo‘l xo‘jaligi sohalarida faoliyatimizni muvaffaqiyatli amalga oshirish imkonini beradi," - deya taʼkidlashdi senatorlar.

 

Xususan, qonun bilan kosmik fazoni ilmiy tadqiq etish, kosmik tizimlarning turlari, yaʼni Yerni masofadan zondlash, kosmik monitoring, kosmik aloqa tizimi, yuqori aniqlikdagi sunʼiy yo‘ldosh navigatsiyasi tizimi va boshqa masalalar nazarda tutilmoqda. Hujjat kosmik obyektlarni markirovkalash va ijaraga berish, kosmik obyektlar va texnik vositalarni utilizatsiya qilish, kosmik infratuzilma va faoliyat xavfsizligi, faoliyatni moliyalashtirish asoslari va xalqaro hamkorlik masalalarini belgilaydi.

 

Qonunda ilmiy, ijtimoiy-iqtisodiy, ekologik, mudofaa, xavfsizlik va boshqa sohalardagi maqsadlarga erishish, shuningdek, kosmik faoliyatning atrof-muhitga, tabiiy resurslarga va aholi sog‘lig‘iga taʼsirini nazorat qilish uchun kosmik texnologiyalar yordamida kosmik makon va Yerni tadqiq etish va ulardan foydalanish kabi masalalarga alohida eʼtibor qaratilgan.