Janubiy Koreyaning yana bir samolyotida muammo chiqdi
Shu sababli uchuvchilar aeroportga qaytishga qaror qilgan.
Janubiy Koreyaning Jeju Air aviakompaniyasiga tegishli yana bir samolyotda shassi bilan bog‘liq muammo yuzaga keldi. Bu haqida Yonhap agentligi xabar berdi.
Agentlikning yozishicha, Chejudan uchgan samolyot ekipaji parvozdan ko‘p o‘tmay shassi bilan bog‘liq muammoni aniqlagan. Shu sababli uchuvchilar aeroportga qaytishga qaror qilgan.
"Mazkur reys 29 dekabr kuni halokatga uchragan samolyotga o‘xshash Boeing 737-800 modeli tomonidan amalga oshirilgan. Hodisa natijasida hech kim jarohat olmadi, samolyot muvaffaqiyatli ravishda uchish aeroportiga qaytib qo‘ndi", deb yozadi Yonhap.
Eslatib o‘tamiz, kecha Bangkokdan uchib kelgan Jeju Air aviakompaniyasiga tegishli samolyot Muan aeroportiga qo‘nish chog‘ida halokatga uchragan edi. Samolyot bortida 175 yo‘lovchi va 6 ekipaj aʼzosi bo‘lgan, ulardan 179 nafari halok bo‘ldi. Halokatga sabab shassi bilan bog‘liq nosozlik yoki qushlar bilan to‘qnashuv bo‘lishi mumkinligi taxmin qilinmoqda.
