Yevropa qurg‘oqchilikdan aziyat chekmoqda
Yevropa Ittifoqi esa suv inqirozidan chiqish harakatlari o‘rniga energiya xavfsizligiga eʼtibor qaratmoqda.
Yevropa Ittifoqi suv tanqisligini tezda bartaraf etishi va suv quvurlarini tuzatish ishlarini moliyalashtirishning yangi usullarini topishi kerak. Bu haqida Atrof-muhit bo‘yicha Yevropa komissari Jessika Rosvall Financial Times gazetasiga bergan intervyusida aytdi.
Rosvallning so‘zlariga ko‘ra, Rossiyaning Ukrainadagi urushi boshlanganidan so‘ng, YI suv taʼminoti inqirozini yengish bo‘yicha saʼy-harakatlar o‘rniga energetika xavfsizligini taʼminlashga eʼtibor qaratgan.
"Biz suv haqida juda kam va energiya samaradorligi va energiya haqida ko‘p gapiryapmiz ... Bu, albatta, juda muhim, lekin suv ham juda muhim va Yevropada u yetarli emas.
Biznes buni endi tushunmoqda, chunki Yevropada qurg‘oqchilik bo‘ldi va biz atom elektr stansiyalari ishlamayotganini, transport katta daryolar bo‘ylab yurolmayotganini ko‘ryapmiz", — deya qo‘shimcha qildi Rosvall sodir bo‘layotgan voqealarga zudlik bilan munosabat bildirish zarurligini aytib.
Yevropa atrof-muhit agentligi tomonidan oktyabr oyida chop etilgan tadqiqotga ko‘ra, Yevropa Ittifoqi hududining beshdan biri va aholisining deyarli uchdan bir qismi har yili suv tanqisligidan aziyat chekadi. Butunjahon meteorologiya tashkiloti maʼlumotlariga ko‘ra, Yevropa Ittifoqida qurg‘oqchilik soni va jiddiyligi ham keskin oshgan. 1976 yildan 2006 yilgacha ushbu o‘zgarishlardan zarar ko‘rgan maydonlar va aholi soni deyarli 20 foizga oshdi.
Fermerlar hosildorlikning keskin pasayishiga duch kelishmoqda. Bu tendensiya sanoatda ham o‘z aksini topdi, to‘qimachilikdan tortib vodorod ishlab chiqarishgacha, unda elektroliz jarayonida suv ishlatiladi.
Qishloq xo‘jaligi va sanoatga yuk ortib borayotganiga qaramay, Yevropa Ittifoqi quvurlar holatini yetarlicha nazorat qilmayapti, dedi Rosvall. Yevrokomissiya maʼlumotlariga ko‘ra, ular orqali yetkaziladigan suvning deyarli to‘rtdan bir qismi tarqatish vaqtida yo‘qotiladi.
Yevropa komissarining so‘zlariga ko‘ra, quvurlarni taʼmirlash va yangi tozalash inshootlarini yaratish uchun "moliyalashtirishning yangi innovatsion usullarini izlash" kerak.
