AQSH Xitoyning 37 ta kompaniyasiga sanksiya kiritdi
Bu Xitoyda majburiy muhnatdan foydalanish bilan bog‘liq.
AQSH ichki xavfsizlik vazirligi (DHS) Xitoyda majburiy mehnatdan foydalanishni taqiqlashga qaratilgan qonun (UFLPA) doirasida yana 37 ta Xitoy kompaniyasini mahsulot importi taqiqlangan ishlab chiqaruvchilar ro‘yxatiga kiritdi.
2022 yilda tuzilgan mazkur ro‘yxatda endi jami 144 ta korxona mavjud. Sanksiyalar tekstil, quyosh panellari ishlab chiqaruvchilari va tog‘-kon sanoati kompaniyalarini qamrab oladi. Ular orasida Zijin Mining Group, Donghai JA Solar Technology, Hongyuan Green Energy va Huafu Fashion kompaniyalari, shuningdek, ushbu kompaniyaning 25 ta shoʻba korxonasi bor.
2022 yil iyunida kuchga kirgan UFLPA qonuni Xitoy, xususan, Sinjon-Uyg‘ur muxtor viloyatida majburiy mehnat va inson huquqlari buzilishlariga qarshi kurashishni maqsad qilgan.
Ushbu qonun qabul qilinishi natijasida ko‘plab kompaniyalar o‘z mahsulot yetkazib berish tarmoqlarini qayta tekshirishga majbur bo‘ldi. AQSH bojxona va chegara nazorati xizmati maʼlumotlariga ko‘ra, qonun qabul qilinganidan buyon umumiy qiymati $3,68 milliardga teng mahsulotlar mamlakatga kiritilishi taqiqlangan yoki to‘xtatilgan.
Mazkur chora-tadbirlar Xitoyning ishlab chiqaruvchi kompaniyalari mahsulotlari xalqaro bozorga chiqish jarayoniga jiddiy taʼsir ko‘rsatishi kutilmoqda.
Kamola Odilova tayyorladi
