Rossiya qo‘shinlari Kiyev va Zaporojega hujum qildi
Oqibatda qurbon bo‘lganlar va yaradorlar bor.
18 yanvar kuni tongda Rossiyaning Kiyevga qilgan hujumi oqibatida kamida to‘rt kishi halok bo‘lgani haqida shahar harbiy maʼmuriyati rahbari Timur Tkachenko maʼlum qildi.
“Rossiya raketalari va dronlari hujumiga uchragan Ukraina poytaxtida yong‘inlar, turar joy binosi, suv taʼminoti quvuri va “Lukyanovskaya” metro bekatiga zarar yetdi. Portlashlardan so‘ng metro bekati yopildi”, — deya maʼlum qildi Kiyev meri Vitaliy Klichko.
Bundan tashqari, bugun tongda Rossiya Zaporojega ham raketa hujumi uyushtirdi.
Viloyat harbiy maʼmuriyati rahbari Ivan Fyodorovning so‘zlariga ko‘ra, Rossiya hujumi natijasida 10 kishi yaralangan, ularning barchasi kasalxonaga yotqizilgan. Zarbalar oqibatida turar joy binolariga zarar yetkazilgan.
“O‘tgan bir sutka mobaynida Rossiya qo‘shinlari Zaporoje viloyatining to‘qqizta aholi punktiga 241 marta turli qurollar bilan hujum qildi”, — deya qo‘shimcha qildi Fyodorov.
