Durov Telegram‘da moderatsiyani yaxshilashga vaʼda berdi
So‘nggi oylarda Telegram‘da jinoyatchilar faoliyati kuchaygan.
"2024 yil 6 dekabrda bo‘lib o‘tgan Fransiyadagi sud majlisida messenjer asoschisi Telegram har oy qonunbuzarliklar uchun 15-20 million akkauntni o‘chirib tashlashini bildirgan. Shuningdek, Durov so‘nggi yarim yil davomida platforma rahbariyati huquq-tartibot organlari bilan faol hamkorlik qilib, turli mamlakatlar hukumatlariga 10 ming nafar foydalanuvchining maʼlumotlarini topshirganini maʼlum qildi", deya xabar bermoqda France Info sud majlisi bayonnomasiga tayanib.
"Telegram jinoyatchilar uchun platforma vazifasini bajarish uchun yaratilmagan", — deya taʼkidlagan Durov.
Pavel Durov Fransiyada Telegram‘ni yetarli darajada moderatsiya qilmaslik va huquq-tartibot organlari bilan hamkorlikdan bo‘yin tovlashda ayblanmoqda. Fransuz tergovchilariga ko‘ra, bu Durovni bolalar pornografiyasini tarqatish, giyohvand moddalar savdosi va firibgarlik kabi jinoyatlarda sheriklikda ayblashga imkon beradi.
Sudyalar 2017 yildan 2024 yilgacha Telegram orqali sodir etilgan jinoyatlarga aloqador taxminan 2 ming jinoiy ish qo‘zg‘atilganini maʼlum qildi. Fransiya huquq-tartibot idoralariga ko‘ra, so‘nggi oylarda Telegram‘da jinoyatchilar faoliyati kuchaygan.
