Yer yuzida halokatli megazilzila kutilmoqda

Geologlar va seysmologlarning taxminiga ko‘ra, keyingi eng katta zilzila yaqin o‘n yilliklarda sodir bo‘lishi mumkin.

 

Geologlar va seysmologlar yaqin 30 yil ichida Yer yuzida halokatli megazilzila sodir bo‘lishi ehtimolini 80 foiz deb baholamoqda. Bu zilzila Yaponiyaning eng katta oroli Xonsyu janubidan o‘tuvchi 900 kilometr uzunlikdagi Nankay jarligida yuz berishi mumkin. Ilmiy maʼlumotlarga ko‘ra, bu hududda 79 yil avval 8,1 magnitudali zilzila sodir bo‘lgan va bu tabiiy ofat katta talafotlarga olib kelgan edi.

 

Nankay jarligi Yevrosiyo va Filippin tektonik plitalarining to‘qnashgan hududi bo‘lib, seysmik faollikning markaziy nuqtasi hisoblanadi. Bu yerda plitalarning bir-biriga botishi natijasida ulkan miqdordagi energiya ajralib chiqadi. Olimlar taʼkidlashicha, ushbu hududda sodir bo‘lishi kutilayotgan megazilzila oldingi ofatlardan ham kattaroq talafot keltirishi mumkin.

 

Eslatib o‘tamiz, 1946 yilgi zilzilada 1362 kishi halok bo‘lgan, 36 mingdan ortiq uy vayron bo‘lgan, va sunamilar 6 metrgacha balandlikka yetgan edi.

 

Nankay jarligidagi ehtimoliy zilzilaning kuchi 2011 yildagi Buyuk sharqiy Yaponiya zilzilasidan ham kattaroq bo‘lishi, qurbonlar soni esa 320 mingdan oshishi mumkinligi taxmin qilinmoqda. Yapon hukumatining fikricha, ushbu jarayonga qarshi kurash strategiyasi milliy xavfsizlikning asosiy yo‘nalishlaridan biri bo‘lib qolmoqda.

 

Mutaxassislar ushbu hududdagi zilzilalar statistik jihatdan har 90-150 yilda sodir bo‘lishini aytmoqda. Biroq zamonaviy texnologiyalar va kuzatuvlarga qaramay, zilzila vaqtini oldindan aniq aytish haligacha mushkul vazifa bo‘lib qolmoqda.