G‘azoda erkaklarning umr ko‘rish davomiyligi 38 yilga qisqardi
Bunga Isroil hujumlari sabab bo‘lgani aytilmoqda.
Ilmiy tadqiqot natijalariga ko‘ra, 2023 yil 7 oktyabrdan keyin Isroil tomonidan G‘azo sektoriga berilgan zarbalar natijasida mahalliy aholining o‘rtacha umr ko‘rish davomiyligi keskin kamaygan.
Xalqaro tadqiqotchilar guruhi 7 oktyabrdan keyingi o‘zgarishlarni tahlil qildi. Maʼlumotlar to‘liq emas, chunki bombardimonlar oqibatida baʼzi jasadlarni aniqlash yoki topish qiyin bo‘lgan. Shu sababli, mahalliy Sog‘liqni saqlash vazirligi ikki xil hisobot berdi.
Faqat shaxsi aniqlangan jasadlar asosida o‘rtacha umr davomiyligi 44,4 yilga tushdi, yaʼni 30 yillik pasayish kuzatildi. Bedarak yo‘qolganlarni ham hisobga olganda, bu ko‘rsatkich 36,1 yilgacha tushdi, bu esa 40 yilga qisqarish deganidir.
Jumladan, erkaklar uchun umr davomiyligi 38 yilga qisqarib, 73,6 yildan 35,6 yilga tushdi, ayollar uchun esa bu ko‘rsatkich 29,9 yilga pasaydi.
Tadqiqotda qayd etilishicha, 2023 yil oktyabr 2025 yil yanvar oralig‘ida G‘azo sektorida 45 936 nafar odam halok bo‘lgan, yana 10 mingdan ortig‘i bedarak yo‘qolgan. Biroq olimlar faqat 41 615 o‘lim holatini tahlilga kiritgan, chunki tadqiqot 2024 yil sentyabrgacha bo‘lgan davr bilan cheklangan.
Komila Odilova tayyorladi
