Xitoyda maxfiy harbiy markaz qurilmoqda
U Pentagondan 10 baravar katta bo‘lishi kutilmoqda.
Pekinning g‘arbiy qismida Xitoy Xalq-ozodlik armiyasining yangi harbiy qo‘mondonlik markazi – “Pekin harbiy shahri” barpo etilmoqda. Qurilish maydoni taxminan 607 gektarni tashkil etadi.
Asosiy qurilish ishlari 2024 yil o‘rtalarida boshlangan bo‘lib, bu loyiha Xitoy Xalq-ozodlik armiyasining 2027 yildagi yuz yillik yubileyiga tayyorgarlik doirasida amalga oshirilmoqda. AQSH razvedka xizmatlari maʼlumotlariga ko‘ra, Xitoy rahbari Si Szinpin armiyani ushbu sanaga qadar Tayvanga hujum qilish salohiyatiga yetkazish bo‘yicha ko‘rsatma bergan.
Manbalarga ko‘ra, yangi markazning keng ko‘lamli infratuzilmasi va qisman yer ostiga joylashtirilishi uni harbiy mojarolar davrida asosiy qo‘mondonlik punkti sifatida ishlatishga mo‘ljallanganidan dalolat beradi.
Xitoylik tadqiqotchilarning fikriga ko‘ra, obyekt maxfiy harbiy markaz belgilariga ega bo‘lib, mustahkamlangan beton konstruksiyalar va chuqur yerosti tunnellari bilan jihozlangan. Uning o‘lchami Pentagonnikidan deyarli o‘n barobar katta bo‘lib, bu Xitoyning harbiy qudratini oshirish borasidagi strategik maqsadlarini aks ettiradi.
Tayvan Mudofaa vazirligiga yaqin manbalar ham ushbu yangi qo‘mondonlik markazi qurilayotganini tasdiqlagan, biroq baʼzi mutaxassislar bu hududning yerosti bunkerlari uchun mos kelishiga shubha bilan qaramoqda.
Komila Odilova tayyorladi
