“Kelajakda dunyoda qancha odam bo‘lsa, shuncha robotlar bo‘ladi”
Ilon Mask bu yil 10 000 ta odamsimon robot ishlab chiqarmoqchi.
Tesla rahbari Ilon Mask kompaniya 2025 yilda 10 000 ta Optimus gumanoid robotlarini ishlab chiqarishga tayyorligini aytdi.
Xabarlarga ko‘ra, Maskning o‘zi bu qiyin ish ekanligini va ishlab chiqarish rejalashtirilganidan kamroq bo‘lishi mumkinligini tan olgan bo‘lsada, u Tesla zavodlarida ishlab chiqarish jarayonlariga yordam berish uchun qo‘llaniladiga bir necha ming robotlarning chiqarilishiga ishonch bildirdi.
Optimus robotlari haqidagi masala ayniqsa 2024 yilda avtomobil biznesi savdosi keskin pasayganidan keyin investorlarning qiziqishini kuchaytirdi. Kompaniya allaqachon o‘z zavodlarida bir nechta robotlarni sinovdan o‘tkazmoqda, ammo taqdimotlarda ular hali ham avtonom emasligi va ularning harakatlari va suhbatlari uchun operatorlar javobgar ekanligi taʼkidlangan.
Tesla oyiga 1000 ta Optimus robotini yaratish uchun ishlab chiqarish liniyasini yaratmoqda va hajmini yiliga 100 million robotgacha oshirishni maqsad qilmoqda. Mask bu robotlar kompaniyaning asosiy daromad manbayi bo‘lishini kutmoqda.
Robotlarni sotish kelgusi yilda boshlanishi rejalashtirilgan. Maskning hisob-kitoblariga ko‘ra, robotning narxi 20 ming dollarni tashkil etadi, bu zamonaviy analoglardan bir necha baravar kam.
G‘oyaga ko‘ra, bunday robotlar odamlarning ayrim ishlarini bajarishga mo‘ljallangan.
Komila Odilova tayyorladI
