Mehnat taʼtiliga haq to‘lash tartibi o‘zgardi
Endi yakshanba kunlari taʼtil to‘lovlarida hisobga olinmaydi.
Prezident Shavkat Mirziyoyev 13-fevral kuni Mehnat kodeksiga o‘zgartirish va qo‘shimchalar kiritish to‘g‘risidagi qonunni imzoladi.
Yangi tartibga ko‘ra, endi yakshanba kunlari mehnat taʼtili davomiyligi va uning uchun to‘lanadigan mablag‘ hisob-kitobida inobatga olinmaydi. Bu qoida foydalanilmagan taʼtillar uchun pul kompensatsiyalariga ham tatbiq etiladi.
Haq to‘lanmaydigan taʼtilning umumiy muddati 12 oylik davr ichida 3 oydan oshmasligi kerak. Ilgari bu cheklov taʼtildan so‘ng kelgusi bir yillik davrga taalluqli edi.
16 yoshgacha bo‘lgan nogiron farzandi yoki 12 yoshgacha bo‘lgan ikki va undan ko‘p bolasi bor ota-onalar hamda vasiylar uchun ish haqi saqlanmaydigan taʼtil muddati eng ko‘pi bilan 14 kun etib belgilandi (avval kamida 14 kun edi).
Ushbu o‘zgarishlar mehnat taʼtili bilan bog‘liq qoidalarni aniqlashtirish va tizimni yaxshilashga qaratilgan.
