Dubay shahzodasi Burj Xalifadan sakradi
Bu ekstremal sportchilar bilan amalga oshirilgan.
Dubay valiahd shahzodasi Shayx Hamdan bin Muhammad bin Roshid Ol Maktum dunyodagi eng baland bino-Burj Xalifadan parashyutda sakradi. Jasoratli sakrash aks etgan video ijtimoiy tarmoqlarda katta e’tibor qozonib, Instagram’da allaqachon 6 milliondan ortiq tomosha qilindi.
Shahzoda ekstremal sportga qiziquvchilar bilan birgalikda bu hayajonli tajribani boshdan kechirdi. U 15 ta mamlakatdan kelgan 31 nafar sportchi bilan Burj Xalifaning 139-qavatidan sakradi. Xabarlarga ko‘ra, ular ikki kun davomida maxsus jihozlangan platformadan jami 437 marta parashyutda sakrashgan.
Sakrash uchun maxsus platforma Burj Xalifaning 139-qavatidan olti metr yuqoriroqqa joylashtirilgan bo‘lib, unda “139-chiqish” deb yozilgan. Videoda shahzoda va ekstremallar havoga sho‘ng‘iyotgani, Dubayning manzarasini osmondan tomosha qilish mumkinligi aks etgan.
Ma’lum qilinishicha, Burj Xalifadan parashyutda sakrash bo‘yicha ilk festival 2014-yilda tashkil etilgan. O‘shandan beri bu an’ana ekstremal sport ixlosmandlari orasida katta qiziqish uyg‘otib kelmoqda.
