Hindistonda erkak kinoteatrni sudga berdi
Bunga reklamalar sabab ishga kechikkani sabab bo'lgan.
Hindistonning Bangalor shahrida yashovchi 30 yoshli erkak kinoteatrda film boshlanishidan oldin haddan tashqari ko‘p reklama namoyish qilingani uchun PVR Inox kinoteatrlar tarmog‘ini sudga berdi va da’voda yutib chiqdi.
2024-yil dekabr oyida Abishek ismli fuqaro do‘stlari bilan “Dovyurak Sem” filmini tomosha qilish uchun kinoga borgan. Film jadvalga ko‘ra 16:05 da boshlanishi kerak edi, ammo film oldidan 25 daqiqa davomida tijorat reklamasi va bo‘lajak filmlar anonsi qo‘yilgan.
Natijada, Abishek ishga kechikkan va rejalashtirilgan boshqa tadbirlarda qatnasha olmagan. U kinoteatr tomoshabinlarning vaqtini tijorat maqsadlarida suiiste’mol qilganini aytib, sudga murojaat qilgan. Sud qarorida "zamonaviy dunyoda vaqt pul bilan teng va uni behuda sarflashga hech kim majbur bo‘lmasligi kerak", deb ta’kidlangan.
Kinoteatr tarmog‘i vakillari ijtimoiy reklamalarni namoyish etish qonuniy talab ekanini aytib, o‘zlarini oqlashga urindi. Biroq sud filmdan oldin ko‘rsatilgan reklamalarning aksariyati tijoriy xarakterga ega ekanini aniqladi va da’vogar foydasiga qaror chiqardi.
Hindistonda kinoreklama sanoati tez rivojlanib, u eng samarali marketing vositalaridan biri hisoblanadi. G‘arb mamlakatlaridan farqli ravishda, Hindiston kinoteatrlarida reklama faqat film oldidan emas, balki film o‘rtasida ham namoyish etiladi.
