Bitcoin narxi keskin pasayishda davom etmoqda
Bunga Trampning siyosati foni sabab bo'lmoqda.
28-fevral kuni Osiyo bozorlari savdosida Bitcoin kursining pasayishi davom etdi. Kriptovalyuta narxi tarixiy maksimumidan 25 foizga tushib, 82 220 dollarga yetdi. Ushbu pasayish so‘nggi olti hafta ichida kuzatilgan eng katta yo‘qotishlardan biri bo‘ldi.
Ma'lum qilinishicha, bu holat Donald Trampning AQSh prezidenti etib saylanishidan keyin shakllangan investorlik kayfiyatining o‘zgarishi bilan bog‘liq. Bitcoin 20-yanvar kuni, Trampning inauguratsiya marosimi bo‘lib o‘tgan kunda, 109 241 dollarlik tarixiy maksimumga yetgan edi. Ammo keyinchalik bozor ishtirokchilari Trampning iqtisodiy siyosati va AQShning global munosabatlariga nisbatan keskin qarashlari tufayli xavotir bildirgan.
Bitcoinning pasayishi boshqa kriptovalyutalarga ham ta’sir ko‘rsatdi. Xususan, Ether, Solana va XRP kabi yirik aktivlar ham keskin tushib ketdi. Bozorning umumiy zaiflashishi investorlarning tavakkal qilishga bo‘lgan ishtiyoqining pasayganini ko‘rsatmoqda.
Bundan tashqari, S&P 500 indeksi ham hafta davomida tushish tendensiyasini qayd etdi. AQSh iste’molchilarining ishonch darajasiga oid salbiy ma’lumotlar iqtisodiy istiqbollarga bo‘lgan xavotirlarni kuchaytirgan. Trampning Kanada va Meksikaga 25 foiz tarif joriy etish, Xitoy importiga esa 10 foiz qo‘shimcha boj solish haqidagi bayonoti esa Osiyo fond bozorlarida ham salbiy ta’sir ko‘rsatdi.
Hozirda kriptovalyuta bozori global iqtisodiy va siyosiy o‘zgarishlarga sezgir bo‘lib, investorlar ehtiyot choralarini ko‘rishga majbur bo‘lmoqda. Bozordagi kelajakdagi tendensiyalar esa iqtisodiy siyosat va global moliya bozorlari harakatlariga bog‘liq bo‘lishi kutilmoqda.
