Dunyo aholisi keskin kamayishi kutilmoqda
Bu ijtimoiy va iqtisodiy oqibatlarga olib kelishi mumkin.
BMT prognozlariga ko‘ra, 2080 yillarda global aholi soni 10,3 milliardga yetishi kutilmoqda, biroq undan keyin pasayish boshlanadi. Hozirgi vaqtda ko‘plab mamlakatlarda tug‘ilish darajasi keskin kamaygan, bu esa demografik muvozanatga taʼsir qilmoqda.
Ko‘pgina rivojlangan davlatlarda tug‘ilish ko‘rsatkichi 2,1 dan past bo‘lib, bu tabiiy aholining qayta tiklanishi uchun yetarli emas. Masalan, Xitoy, Rossiya va Yaponiya aholisi allaqachon kamayishni boshlagan va 2054 yilga kelib, bu mamlakatlarda aholi soni 14 foizga qisqarishi mumkin. Tug‘ilishning pasayishiga urbanizatsiya, ayollarning oliy taʼlim va ish bozorida faol ishtirok etishi hamda iqtisodiy omillar sabab bo‘lishi mumkin.
Ushbu tendensiya ijtimoiy va iqtisodiy oqibatlarga olib kelishi kutilmoqda. Masalan, keksalar soni yosh bolalarga nisbatan ko‘payib boradi, bu esa pensiya tizimiga va mehnat bozoriga jiddiy taʼsir qiladi. Shuningdek, ayrim mamlakatlar ishchi kuchi yetishmovchiligini hal qilish uchun migratsiya siyosatini o‘zgartirishga majbur bo‘lishi mumkin.
