Londonda Ukraina bo‘yicha muhim muzokara bo'lib o'tdi

 

Buyuk Britaniya Bosh vaziri Kir Starmer va Ukraina Prezidenti Vladimir Zelenskiy Londonda uchrashib, ikki tomonlama muzokaralar o‘tkazdi. Bu uchrashuv Ukraina bo‘yicha sammit arafasida bo‘lib o‘tdi.

 

Zelenskiy 1-mart kuni Britaniya hukumatining rasmiy qarorgohiga tashrif buyurdi. Uchrashuv bir soat davom etdi va undan so‘ng Starmer mehmonini avtomobiligacha kuzatib qo‘ydi.

 

Muloqot davomida Buyuk Britaniya Bosh vaziri Qirollikning Ukrainaga bo‘lgan qat’iy qo‘llab-quvvatlovi haqida gapirdi:

– Eshitib turganingizdek, tashqaridan kelayotgan ovozlar butun mamlakatdagi xayrixohlikning isboti. Biz siz bilanmiz va Ukraina bilan birga qolamiz, – dedi Starmer.

 

U Buyuk Britaniya Ukrainaga yordam berishda davom etishini ta’kidlab, Kiyevning suvereniteti va xavfsizligi Yevropadagi barqaror tinchlikning garovi ekanini qayd etdi.

 

O‘z navbatida, Zelenskiy Britaniya hukumati va fuqarolariga ko‘rsatib kelayotgan yordami uchun minnatdorlik bildirdi. Shuningdek, u tashrifi davomida Qirol Charlz III bilan ham uchrashish niyatida ekanini ma’lum qildi.

 

– Biz sizdan qo‘llab-quvvatlov kutamiz, – dedi Ukraina Prezidenti qarorgohni tark etarkan.

 

Ukraina OAV xabarlariga ko‘ra, Buyuk Britaniya Kiyevning mudofaa ehtiyojlari uchun 2,6 milliard funt-sterling miqdorida moliyaviy kelishuv imzolagan.

 

Zelenskiy AQShda Donald Tramp bilan bahsga kirishganidan so‘ng Londonga yetib keldi. Bugun esa Buyuk Britaniya poytaxtida Ukraina bo‘yicha muhim sammit bo‘lib o‘tishi rejalashtirilgan.