Dunyodagi eng saxovatli donor vafot etdi
Uning qoni 2 milliondan ortiq bolaning hayotini saqlab qolgan.
Dunyodagi eng saxovatli donor sifatida tan olingan avstraliyalik Jeyms Xarrison 88 yoshida vafot etdi. U 17-fevral kuni Yangi Janubiy Uelsdagi qariyalar uyida hayotdan ko‘z yumdi.
Jeyms Xarrison 1954-yilda donorlik faoliyatini boshlagan va oradan ko‘p o‘tmay, uning qonida noyob antikor borligi aniqlangan. Bu kashfiyot Anti-D preparatini ishlab chiqishda asos bo‘ldi, natijada Avstraliyada rezus mos kelmasligi sabab chaqaloqlarda yuzaga keladigan gemolitik kasallikning oldini olish imkoniyati yaratildi.
Xarrison hayoti davomida 1173 marta qon topshirgan va uning saxovatli yordami tufayli 2,4 milliondan ortiq chaqaloqning hayoti saqlab qolingan. U Avstraliyada "oltin qo‘lli odam" nomi bilan mashhur bo‘ldi.
Xarrison 14 yoshida og‘ir jarrohlik amaliyotidan so‘ng donorlarning qoni tufayli omon qolgan. Shundan so‘ng, u balog‘at yoshiga yetishi bilan donorlik qilishni maqsad qilgan va 2018-yilgacha, ya’ni 81 yoshigacha, bu ishni davom ettirgan.
Avstraliyaning Lifeblood tashkiloti Jeyms Xarrisonning fidoyiligi haqida shunday bayonot berdi:
"Jeyms bizning Anti-D dasturimizning kashshofi edi. 1967-yildan beri uning qoni ishlatilgan Anti-D preparatining 3 milliondan ortiq dozasi manfiy qon guruhiga ega onalarga berilgan."
Jeyms Xarrison o‘z mehr-muruvvati va insonparvarligi bilan butun dunyoga donorlikning naqadar muhimligini isbotlagan inson sifatida tarixda qoladi.
