Toshkentda shifoxonalar bemorni qabul qilishdan bosh tortdi
Tez yordam bemorni 4 marta turli shifoxonalarga olib borgan.
Ijtimoiy tarmoqlarda Toshkent shahar tez tibbiy yordam xodimlari bir bemorni bir necha tibbiyot muassasasiga olib borib, oxirida uni ko‘p qavatli uy yo‘lagida qoldirib ketgani haqida xabar tarqaldi. Respublika tez tibbiy yordam markazi bu holat yuzasidan rasmiy bayonot berdi.
Ma’lum bo‘lishicha, 1953-yilda tug‘ilgan, aniq yashash manzili bo‘lmagan fuqaro M.B. 2025-yil 23-fevraldan beri tez tibbiy yordam xizmatiga bir necha bor murojaat qilgan. Har safar unga zaruriy tibbiy xizmatlar ko‘rsatilgan va u 4-son va 1-son shahar klinik shifoxonalariga bir necha marotaba olib borilgan.
6-mart kuni ro‘y bergan voqealar
Soat 10:53 da Bo‘zsuv 1/21 manzilidan chaqiruv kelgan. Tez yordam brigadasi bemorni tekshirib, 1-son shahar klinik shifoxonasiga olib borgan. Shifokorlar shoshilinch holat yo‘qligini aytib, bemorni qabul qilmagan. Yashash manzili aniq bo‘lmagani sababli "102" xizmatiga xabar berilib, u yana avvalgi joyiga qaytarilgan.
Soat 13:34 da shu manzildan ichki ishlar xodimi yana chaqiruv bergan. Bemorga tibbiy yordam ko‘rsatilgan, so‘ng u o‘zining yashash manzilini Bunyodkor ko‘chasidagi 421-uy deb ko‘rsatgani sababli tegishli xizmatlar bilan kelishilgan holda u yerga olib borilgan.
Soat 19:48 da shu manzildan yo‘lovchi tomonidan yana chaqiruv qilingan. Tez yordam brigadasi bemorni tekshirib, shoshilinch holat yo‘qligi sababli uni o‘sha joyning o‘zida qoldirgan.
Soat 20:31 da Ichki ishlar xodimi yana chaqiruv bergan. Tez yordam xizmati bemorni ko‘rikdan o‘tkazib, IIB xodimining iltimosiga ko‘ra yana 1-son shahar klinik shifoxonasiga olib borgan. U yerda shifokorlar unga "o‘ng tomonda yiringli yara" tashxisini qo‘yib, kasalxonaga yotqizishgan.
Ayni paytda fuqaro M.B. Respublika ixtisoslashtirilgan onkologiya va radiologiya ilmiy-amaliy tibbiyot markazining Toshkent shahar filialida rejali muolajalar olmoqda.
