Moldovada 6 yoshli bola meningitdan vafot etdi
U 2 kun yuqori isitma bilan yurgan.
Kishinyovda 6 yoshli bola meningitdan vafot etdi. U shifoxonaga yotqizilganidan atigi bir yarim soat o‘tib hayotdan ko‘z yumdi.
Bolada dastlabki alomatlar 1 mart kuni kechqurun paydo bo‘lgan. Harorati 39,5°C gacha ko‘tarilgan, ammo tushirilgandan so‘ng 2 mart kuni ertalab yana oshgan. Tush soat 12:30 ga kelib uning qo‘llarida qizil dog‘lar paydo bo‘lib, tezda butun tanaga tarqalgan. Soat 13:30 da ota-onasi tez yordam chaqirishga majbur bo‘lgan. Bolani kasalxonaga olib ketishgan, lekin shifokorlar uni saqlab qola olmagan.
Oxirgi 10 yil ichida Moldovada 220 dan ortiq meningit holati qayd etilgan bo‘lib, ularning aksariyati bolalar orasida kuzatilgan. 2025 yil boshidan beri 1 yoshdan 9 yoshgacha bo‘lgan bolalar orasida 5 ta meningokokk infeksiyasi holati aniqlangan.
Moldova Sog‘liqni saqlash vazirligi meningokokk infeksiyasiga qarshi 2,5 ming doza vaksina sotib olishini maʼlum qildi. U milliy emlash taqvimiga kiritiladi va bolalarga bepul yuboriladi, ammo majburiy emas.
