Xitoyda dunyodagi eng tezkor poyezd yaratilmoqda

 

Xitoyning CRRC Corporation Limited kompaniyasi dunyodagi eng tezkor poyezd bo‘lishga da’vogarlik qilayotgan CR450 prototipini sinovdan o‘tkazishni boshladi. Poyezd ilk bor Pekindagi eksperimental temiryo‘l halqasida sinovdan o‘tkazildi. Bu haqda kompaniyaning vitse-prezidenti Van Fen "Science and Technology Daily" nashriga ma’lum qildi.

 

Yangi CR450 poyezdi hozirda foydalanilayotgan CR400 Fuxing poyezdlaridan sezilarli darajada tezroq harakatlana oladi. CR400 Fuxing maksimal 350 km/soat tezlikda harakatlana olsa, yangi model sinovlarda 450 km/soat tezlikka erishgan. Van Fenning ta’kidlashicha, bu loyiha yuqori tezlikda harakatlanadigan poyezdlar sohasida nazariy, texnologik va muhandislik jihatdan katta yutuq hisoblanadi.

 

Xitoy Transport vazirligi ma’lumotlariga ko‘ra, CR450 poyezdi hozirda har tomonlama baholanmoqda. Poyezdga 4 mingdan ortiq sensor va kuzatuv tizimlari o‘rnatilgan bo‘lib, ular real vaqt rejimida harakat tizimlari, kuzov barqarorligi, kuchlanishli tok qabul qiluvchilar, boshqaruv tizimi va yong‘in xavfsizligi kabi asosiy elementlarni nazorat qilib boradi.

 

Bundan tashqari, ultra uzoq masofali aniqlash tizimi xavfli holatlarni oldindan sezish va oldini olish imkoniyatini oshiradi. Muhandislarning fikriga ko‘ra, yangi poyezd nafaqat tezligi, balki xavfsizlik va energiya samaradorligi jihatidan ham zamonaviy standartlarga javob beradi.

 

CR450 poyezdi sinovlardan o‘tganidan so‘ng Xitoyning temiryo‘l tizimida foydalanishga topshirilishi kutilmoqda. Ushbu loyiha nafaqat mamlakat ichki transportini rivojlantirishga, balki Xitoyni yuqori tezlikdagi temiryo‘llar bo‘yicha dunyo yetakchisiga aylantirishga xizmat qiladi.