Chilida to‘rtta avtobus ishtirokida avtohalokat sodir bo'ldi
Fojia oqibatida 6 kishi halok bo'ldi.
Chilining Kokimbo viloyatida kechasi sodir bo‘lgan yirik yo‘l-transport hodisasi kamida 6 kishining hayotiga zomin bo‘ldi, yana 40 dan ortiq odam jarohatlandi.
BioBio radiostansiyasining xabariga ko‘ra, avvaliga bir avtobus yo‘lda ag‘darilib ketgan, shundan so‘ng ikki boshqa avtobus haydovchilari to‘xtab, jabrlanganlarga yordam berishga harakat qilgan. Shu vaqtda katta tezlikda kelayotgan yana bir avtobus to‘xtab turgan transport vositalariga urilgan. Guvohlarning aytishicha, ushbu avtobus haddan tashqari tez yurgan.
Avariya tunda sodir bo‘lgani tufayli qutqaruv operatsiyasi murakkablashgan. Qurbonlar orasida halokatga sabab bo‘lgan avtobus haydovchisi ham bor.
Ma’lumotlarga ko‘ra, 12 nafar yo‘lovchi og‘ir ahvolda shifoxonaga yotqizilgan. Rasmiylar hodisa tafsilotlarini o‘rganmoqda.
