Janubiy Koreyada zobitlar ishdan chetlatildi

 

Janubiy Koreya Qurolli Kuchlari Harbiy-havo kuchlari ikkita yuqori lavozimli zobitni – polkovnik va podpolkovnikni ishdan bo‘shatdi. Ular qiruvchi samolyotlar mashg‘uloti chog‘ida turar-joy hududini yanglish bombardimon qilgani uchun javobgarlikka tortilgan.

 

Xabarlarga ko‘ra, bu qaror xizmat majburiyatlarini qo‘pol buzish va yetarli nazorat o‘rnatilmaganligi sabab qabul qilingan.

 

Eslatib o‘tamiz, 6-mart kuni Janubiy Koreyaning ikkita KF-16 qiruvchi samolyoti mashg‘ulot vaqtida Pocheon shahri, Idong tumanidagi Nogok qishlog‘iga 8 ta bomba tashlagan edi. Bombalar ko‘chalarga tushib, bir nechta binoga, jumladan, cherkovga zarar yetkazgan.

 

Rasmiylarning ta’kidlashicha, hodisaga uchuvchining xatosi sabab bo‘lgan. U parvozga tayyorgarlik chog‘ida nishon koordinatalarini noto‘g‘ri kiritgan. Oqibatda 29 kishi, jumladan, 14 harbiy jarohat olgan, tinch aholi orasidagi yaradorlar soni esa yangilangan ma’lumotlarga ko‘ra 19 nafarga yetgan.