Vashington Ukrainaga harbiy yordamni qayta tiklashga rozi
Bu haqida Jidda shahrida kelishuvga erishilgan.
Ukraina va AQSH delegatsiyalari Saudiya Arabistonining Jidda shahrida bo‘lib o‘tgan muzokaralarni yakunladi. Ukraina prezidentining devoni rahbari Andrey Yermak, Ukraina AQSHning 30 kunlik o‘t ochishni to‘xtatish rejimini qabul qilishga tayyorligini bildirdi.
Yermak AQSH Rossiyaga tinchlikka erishish uchun o‘zaro kelishuv zarurligini aytganini qo‘shimcha qildi. Shuningdek, u Qo‘shma Shtatlar “razvedka maʼlumotlarini almashishdagi pauzani darhol bekor qilgani” va Ukrainaga xavfsizlik yordamini tiklaganini maʼlum qildi. Muzokaralarda Kiyev va Moskva o‘rtasida harbiy asirlarni almashish va majburan ko‘chirilgan ukrainalik bolalarni qaytarish masalalari ham muhokama qilingan.
Yermak, shuningdek, har ikki davlat prezidentlari nodir yer metallari bo‘yicha shartnomani tezroq tuzishga kelishib olganini bildirdi. Qo‘shma Shtatlar ushbu takliflarni Rossiya vakillari bilan muhokama qilish majburiyatini oldi.
