Xitoylik ayol 36 erkakni chuv tushirdi
Ayol erkaklarni uy olishga ishontirib, keyin g‘oyib bo‘lgan.
Xitoyning Shenchjen shahrida yashovchi ayol 36 erkakni ipoteka kreditini olishga ko‘ndirib, ularni aldadi. Jabrlanuvchilar aytishicha, ular Liu Jia ismli ayol bilan ijtimoiy tarmoq orqali tanishishgan. U o‘zini aqlli, diqqatli va oilaparvar inson sifatida ko‘rsatgan. Jabrlanganlardan birining aytishicha, ular uchrashganlaridan atigi bir oy o‘tib, ayol nikoh haqida gapira boshlagan.
Liu Jia barcha erkaklarga bitta sxema asosida yondashgan. U "orzusidagi uyini" qurishni orzu qilishini, ammo ijarada yashashni istamasligini bildirgan. Erkaklarni ipoteka kreditini olishga ishontirib, dastlabki to‘lovga moliyaviy yordam berishga va’da qilgan.
Ayol jabrlanuvchilarni aynan Xuychjou shahridagi ikkita muayyan mahallada uy sotib olishga yo‘naltirgan. Bu hududlarda ishlab chiquvchilar potentsial xaridorlarga 100 000 yuan (taxminan 12 600 yevro) subsidiya taklif qilgan.
Shartnomalar imzolanib, ipoteka kreditlari berilgach, Liu Jia o‘z ismini uy egalik hujjatlariga kiritishdan bosh tortgan, hech qanday moliyaviy yordam ko‘rsatmagan va barcha erkaklarni aloqadan chiqarib tashlagan. Ma’lumotlarga ko‘ra, u ko‘chmas mulk agentlari va qurilish kompaniyalari bilan til biriktirib, o‘zi olib kelgan mijozlar orqali foyda olgan.
Hozircha ushbu firibgarlik bo‘yicha rasmiy jinoiy ish qo‘zg‘atilgani noma’lum, ammo bu voqea Xitoy ijtimoiy tarmoqlarida keng tarqalgan va jamoatchilik orasida katta shov-shuvga sabab bo‘lgan.
