Argentinada norozilik namoyishlari avj oldi
Hozirda150 kishi hibsga olingan.
Buenos-Ayres markazida bo‘lib o‘tgan norozilik namoyishi politsiya bilan to‘qnashuvlarga aylanib ketdi. Xavfsizlik kuchlari tartibsizliklarni bostirish chog‘ida 150 kishini qo‘lga oldi.
Argentina xavfsizlik vaziri Patrisiya Bulrixning ma’lum qilishicha, voqealar davomida 15-17 nafar politsiyachi jarohatlangan. "Namoyishda qatnashganlarning aksariyati muxlislar va so‘l guruh vakillari bo‘lib, ular tajovuzkor harakatlarga tayyor edi", dedi u.
12 mart kuni Kongress binosi yonida uyushtirilgan norozilik aksiyasida nafaqalar kamligi va yashash sharoitining og‘irligidan norozi pensionerlar, shuningdek, ularni qo‘llab-quvvatlagan futbol muxlislari ishtirok etdi. Taxminan ikki ming kishi maydon va uning atrofida to‘planib, o‘z noroziliklarini bildirgan.
Namoyish boshlanganidan ko‘p o‘tmay, huquq-tartibot xodimlari va namoyishchilar o‘rtasida to‘qnashuvlar yuzaga keldi. Yoshlar politsiyaga tayoq, shisha va tosh otgan, bunga javoban politsiya ko‘zdan yosh oqizuvchi gaz va suv purkagichlardan foydalangan. Namoyishchilar barrikadalar qurishga, politsiya mashinalari va axlat qutilariga o‘t qo‘yishga uringan.
