Rossiya Ukrainadagi urushni tugatish talablarini taqdim etdi
Ular Amerika rasmiylari bilan muhokama qilingan.
Rossiya AQShga Ukrainaga qarshi urushni tugatish va ikki davlat o‘rtasidagi munosabatlarni tiklash bo‘yicha talablar ro‘yxatini yubordi. Moskva ushbu talablarni so‘nggi uch hafta ichida yuzma-yuz va virtual uchrashuvlarda Amerika rasmiylari bilan muhokama qilgan. Ushbu talablar avvalroq Rossiya tomonidan Ukraina, AQSh va NATOga qo‘yilgan shartlarga o‘xshash ekani aytilmoqda.
Rossiyaning oldingi talablariga Ukrainaning NATOga a’zo bo‘lishidan voz kechishi, Qrim va Donbass hududlarining Rossiyaga tegishli ekani tan olinishi va Ukraina hududiga xorijiy qo‘shinlar kiritilmasligi kabi shartlar kirgan edi. Rossiya, shuningdek, NATOning sharqqa kengayishini urushning asosiy sababi sifatida ko‘rib, bu masalani hal qilishga chaqirgan.
AQSh prezidenti Donald Tramp esa Putinning 30 kunlik o‘t ochishni to‘xtatish bo‘yicha kelishuvga rozi bo‘lishini kutayotganini ma’lum qildi. Ukraina prezidenti Vladimir Zelenskiy buni tinchlik muzokaralariga qo‘yilgan ilk qadam sifatida baholadi. Ammo ayrim AQSh rasmiylari va ekspertlari Putin bu kelishuvdan G‘arb davlatlari o‘rtasidagi kelishmovchiliklarni kuchaytirish va muzokaralarni izdan chiqarish uchun foydalanishi mumkinligini ta’kidlamoqda.
