Rossiyada ona ikki yashar o‘g‘lini “tinchlantirish” bahonasida o‘ldirdi
Ona bolasiga giyohvand moddalar ukol qilgan.
Rossiyaning Chelyabinsk viloyatidagi Miass shahrida 31 yoshli ona o‘zining ikki yashar o‘g‘lini “tinchlantiruvchi” bahonasida giyohvand moddalar ukol qilib o‘ldirdi. Fojia yanvar oyida sodir bo‘lgan bo‘lsa-da, chaqaloqning o‘limiga aniq sabablar endi oydinlashgan.
Rossiya Tergov qo‘mitasining ma’lumotiga ko‘ra, bolaning jasadi 22-yanvarga o‘tar kechasi uyidan topilgan. Sud-tibbiy ekspertiza chaqaloq giyohvand moddalar aralashmasidan zaharlanib vafot etganini tasdiqladi. Tergov davomida ayol o‘g‘lining yig‘isiga dosh bera olmay, uni tinchlantirish maqsadida bir necha marta giyohvand moddalarni ukol qilgani ma’lum bo‘lgan.
Hozirda unga nisbatan “Voyaga yetmagan bolani qasddan o‘ldirish” moddasi bo‘yicha jinoyat ishi qo‘zg‘atilgan. Sud uni hibsga olish to‘g‘risida qaror chiqargan. Shuningdek, oilada yana uch nafar bola borligi aniqlanib, ularning yashash sharoiti va farovonligi bo‘yicha tekshiruv o‘tkazilmoqda.
Statistik ma’lumotlarga ko‘ra, Rossiyada har yili yuzlab bolalar ota-onalari tomonidan zo‘ravonlik qurboniga aylanadi. 2020-yilda bunday holatlar soni 1674 taga yetgan, ulardan 105 nafari esa halok bo‘lgan. Mutaxassislarning fikricha, pandemiya va uning asoratlari oilalardagi stressni kuchaytirib, vaziyatni yanada og‘irlashtirgan.
