Turkiyada shifokor ayollarni homiladorlikka ishontirib, firibgarlik qilgan
Hozirda tergov ishlari davom etmoqda.
Turkiyaning Shirnak viloyatida ginekolog bo‘lib ishlagan İsmet Besen ismli shifokor ayollarni yolg‘on homiladorlikka ishontirib, keyinchalik ularga homiladorlik tugamaganini aytgan va pul evaziga abort qilgan. Bu mudhish jinoyat ortidan olib borilgan tergov natijasida o‘nlab ayollar jabrlangani ma’lum bo‘ldi.
Tergov natijalariga ko‘ra, 58 yoshli shifokor bemorlariga maxsus dori vositalarini bergan, bu esa homiladorlik testlarini soxtalashtirib, ayollarga homiladorlik hissini paydo qilgan. Keyinchalik u chaqaloq bachadonda vafot etganini aytib, sun’iy abort amaliyotini o‘tkazgan va shu orqali katta miqdorda pul ishlab topgan.
Firibgarlik Byurosi tomonidan olib borilgan tergovda 12 nafar jabrlanuvchi ayol guvohlik berdi. DNK tahlillari natijasida shifokor operatsiya qilgan ayollarning homilalari ularga tegishli emasligi aniqlandi. Shuningdek, shifokorning Shirnak, Aydin va Izmir shaharlarida joylashgan klinikalarida ham tekshiruvlar o‘tkazildi va natijada İsmet Besen hamda uning 4 nafar yordamchisi qo‘lga olindi.
Besen 14-fevral kuni rasmiy ravishda hibsga olingan va unga “yirik miqyosdagi firibgarlik” aybi qo‘yilgan.
Tergov davomida Besenning avval ham noqonuniy ishlarga qo‘l urgani aniqlangan. U 2006-yilda “Yil shifokori” unvonini olgan bo‘lsa-da, 2007-yilda dori vositalari bilan bog‘liq firibgarlik uchun hibsga olingan. Hozirda ushbu ish bo‘yicha 3 ta klinika va 9 ta dorixonaning egalari ham tergov ostida.
Shifokorning faoliyati tekshirilganda, faqat 7 oy ichida 25 mingdan ortiq bemorni qabul qilgani va ularga turli dorilar yozib bergani aniqlangan. 2005-yilda esa u Silopi Davlat kasalxonasida kuniga o‘rtacha 171 bemorni qabul qilib, retsept yozgan. Bundan tashqari, tergov jarayonida Besenning Anqarada 15 ta ko‘chmas mulkka egaligi ham ma’lum bo‘lgan.
